दुई दिनदेखि ताल बनेर थुनिएको मर्स्याङ्दी अझै खुलेन

---

मनाङ । शनिबारदेखि मनाङको चामेममा पहिरो गएर आंशिक रुपमा थुनिएको मर्स्याङ्दी नदी पूर्ण रुपमा अझै खुलेको छैन । नदी थुनिएर ताल परेकोले तल्लो तटीय क्षेत्रमा जोखिम कायमै रहेको छ ।

शनिबार हुम्डेमा पहिरो खसेपछि मर्स्याङ्दी नदी आंशिक रुपमा थुनिएको थियो । हुम्डेको पहिरो आइतबार ठूलो भेलले खुलाए पनि चामेको बेलिब्रिजमा बनेको ताल भने अझै फुटाउन सकिएको छैन ।

आइतबार रातभर प्रयास गरे पनि खुलाउन नसकिएको मनाङका प्रमुख जिल्ला अधिकारी विष्णु लामिछानेले जानकारी दिए । पुलमा अड्किएका केही काठपात त झिकिए पनि ठूलाठूला चट्टानहरु हटाउन नसकिएको उनको भनाइ छ ।

उनका अनुसार आइतबार साँझसम्म पनि मर्स्याङ्दी बेलिब्रिज माथिबाटै बगेको छ । प्रजिअ लामिछानेले ताल फुटाउन ब्लाष्टिङ गर्ने विषयमा अध्ययन भैरहेको बताए । ब्लाष्टिङ गर्ने विषयमा नेपाली सेनाले अध्ययन गरिरहेको र ब्लाष्टिङ गर्दा बेलिब्रिज तथा पाँच सय मिटर वरपरका घरहरुलाई असर गर्नसक्ने जोखिम पनि रहेको उनको भनाइ छ ।

चामे बजारबाट बग्ने घट्टेखोलाले ल्याएका रूख र ठूलाठूला ढुंगा मर्स्याङ्दीमा अड्किएकाले उक्त क्षेत्रमा ताल बनेको हो । निरन्तर पानी परिरहेको मर्स्याङ्दीमा बाढीको बहावमा कुनै कमी नआएको जोखिम कायमै रहेको मनाङ प्रहरी प्रमुख डिएसपी सुवास खड्काले जानकारी दिए ।