राहत लिएरै जुनीचाँदे पुगे उपप्रधानमन्त्री

---

सुर्खेत । उपप्रधानमन्त्री तथा रक्षामन्त्री पूर्णबहादुर खड्का भूकम्पपीडितका लागि राहत सामग्री लिएर जाजरकोट पुगेका छन्। भूकम्पपीडितले राहत नपाएको गुनासो आएपछि उपप्रधानमन्त्री खड्का आफैं राहत सामग्री लिएर प्रभावित क्षेत्र जाजरकोटको जुनीचाँदे गाउँपालिका पुगेका हुन् ।

उपप्रधानमन्त्री खड्काले राहत सामग्री गाउँपालिकाको वडा नं. ३ मा पुगेर हस्तान्तरण गरे। उक्त अवसरमा कर्णाली प्रदेशका सभामुख नन्दा गुरुङ पनि उपप्रधानमन्त्री खड्कासँगै थिइन्। गत शुक्रबार राति भूकम्प गएयता उपप्रधानमन्त्री भूकम्पपीडितको उद्धार, राहतमा जुटेका छन्।

भूकम्प गएयता उपप्रधानमन्त्री खड्का सबै पूर्वनिर्धारित कार्यक्रम स्थगित गरी प्रभावितहरुको उद्धार र राहतमा सक्रिय छन्। राहत वितरणपछि पुनःस्थापनाको काम सुरु नहुँदासम्म उनी भूकम्प प्रभावित क्षेत्रमै बसेको खड्काको सचिवालयले जनाएको छ। सरकारले यतिबेला सम्पूर्ण शक्ति भूकम्पपीडितको उद्धार, राहत वितरण र पुनःस्थापनामा केन्द्रित गरेको बताउँदै यस संकटमा साथ दिनेलाई खड्काले धन्यवाद पनि दिए।