१० बैशाख २०८१, सोमबार

सुर्खेतमा कोरोनाविरुद्धको खोप लगाइँदै


सुर्खेत । सुर्खेतका चार पालिकामा कोरोनाविरुद्धको खोप लगाउन थालिएको छ । वीरेन्द्रनगर नगरपालिका, पञ्चपुरी नगरपालिका, चिङ्गाड गाउँपालिका र चौकुने गाउँपालिकामा खोप लगाउन थालिएको हो  ।
१२ वर्षमाथिकालाई चैत १ देखि ३ गतेसम्म खोप लगाइने स्वास्थ्य सेवा कार्यालय सुर्खेतले जनाइएको छ ।
स्वास्थ्य सेवा कार्यालय सुर्खेत र इपिक नेपालको संयुक्त आयोजनामा कोरोनाविरुद्धको खोप लगाउन थालिएको जिल्ला स्वास्थ्य सेवा कार्यालय सुर्खेतका खोप फोकल पर्सन घनश्याम बुढाले बताए । ‘पश्चिम सुर्खेतका बासिन्दा रोजगारका लागि भारततिर जाँदा विगतमा खोप छुटेकाले खोप लगाउन थालिएको हो ।’ उनले भने,‘पञ्चपुरी, चौकुने, बराहताल पालिकाका बासिन्दा मौसमी रोजगारीका लागि भारततिर जाने गर्छन् । अहिले उनीहरू घर फर्कन थालेकाले पुनः खोप लगाउन लागिएको छ ।’
चार वटा पालिकाका लागि १९ हजार आठ सय डोज खोप आइसकेको छ । एउटा पालिकामा तीन हजार तीन सय डोज खोप छुट्याइएको बुढाले बताए ।
सुर्खेत जिल्लामा कोभिड–१९ को पहिलो डोजको खोप कभरेज ९२ प्रतिशत छ । दोसो डोजको खोप कभरेज केही घटेर ८१ प्रतिशतमा झरेको छ । पहिलो बुस्टर डोजको कभरेज ३७ प्रतिशत र दोस्रो बुस्टर डोजको कभरेज १.४ प्रतिशत मात्रै रहेको स्वास्थ्य सेवा कार्यालय सुर्खेतले जनाएको छ ।