वडाध्यक्ष समितिको अध्यक्ष बनी लाखौ रकम हिनामिना
कालीकोटः जिल्लाको पलाता गाउँपालिका–२ मा आएको मुख्यमन्त्री निर्वाचन विकास क्षेत्र अन्तरगतको एकिकृत नमुना अर्गानीक कृषि प्रवद्धन योजना निमार्णमा व्यापक अनियमितता भएको पाइएको छ ।
पलाता गाउँपालिका–वडा नं २ का वडाध्यक्ष उपभोक्ता समितिका अध्यक्ष बनेको योजनामा अनियमितता भएको पाइएको हो । आर्थिक वर्ष २०७६÷०७७ को मुख्यमन्त्री निर्वाचन विकास क्षेत्रको ४० लाखको योजनामा व्यापक अनियमितता भएको छ । पलाता गाउँपालिका वडा नं २ का वडाध्यक्ष बिद्वि कामी (बिरी) आफु उपभोक्ता समितिको अध्यक्ष बनेर रकम हिनामिना गरेका हुन् ।
उनले ४० लाखको योजनालाई १० लाखमा ठेक्का दिएर ३३ लाख भुक्तानि लगी रकम अनियमितता भएको पाइएको छ । पलाता गाउँपालिकाका कृषि शाखा प्रमुख उत्तम शाही एकिकृत नमुना अर्गानीक कृषि प्रवद्धन कार्यक्रम अन्तरगतका सचिव रहेका छन् । सचिव र वडाध्यक्षको मिलेमत्तोमा रकम हिनामिना भएको बताइएको छ । मुख्यमन्त्री निर्वाचन विकास क्षेत्र अन्तरगर्तका योजनामा व्यापक अनियमितता भएको पलाता गाउँपालिकाका स्थानीयले बताएका छन् । ४० लाखको उपभोक्ता समिति बनेको वडाध्यक्ष कामीले आइते सार्कीलाई ठेक्का दिएका थिए ।
तर उपभोक्ता समितिका कोषाध्यक्षका श्रीमान हरि विकका अनुसार १० लाखमा ठेक्का दिएको बताएपनि यता ठेक्का लिएका आइते सार्कीले १५ लाखमा ठेक्का लिएको दावि गरे । योजनाको कुल लागत ४० लाख भए पनि ३३ लाख भुक्तानि भएको छ । सम्पन्न भएको एकिकृत नमुना अर्गानीक कृषि प्रवद्धन कार्यक्रम अन्तरगतको पोखरीमा पनि ईस्टेमेन्ट अनुसार काम नगरेको कोषाध्यक्षका श्रीमान हरि विकले बताए । उनका अनुसार ५३ क्विटल सरिया र ४ सय भन्दा बढी सिमेन्ट भनिएको भएपनि योजनामा १६ क्विन्टल सरिया र १ सय ३६ बोरा सिमेन्टमात्र प्रयोग गरिएको छ ।
वडाध्यक्ष विकले उपभोक्ता समितिका सचिव पलाता गाउँपालिका कृषि शाखाका प्रमुख उत्तम शाहीलाई ८३ हजार र कोषाध्यक्षलाई ६३ हजार नगद रुपैया दिएका छन् । बाकी रुपैया वडाध्यक्षले कसरी खर्च गरे लेखाजोखा पनि भएको छैन् । यता कृषि कार्यालयका लेखापाल विश्वामित्र उपाध्यायले उक्त योजनाको ३३ लाख रकम भुक्तानी भईसकेको बताए । उनले उपभोक्ता समिति प्रक्रियागत रुपमा आएपछि आफुले भुक्तानी दिएको दावि गरे ।
यसरी सम्पूर्ण खर्च कटाउदा पनि उपभोक्ता समितिका अध्यक्षले १२ लाख भन्दा बढी रकम हिनामिना गरेको देखिन्छ । ४० लाखको योजनामा कृषि विकास कार्यालयले ४ लाख ५० हजार लिएर २ वटा ट्याङकीको डिटेल सर्भेका लागि रकम कट्टा गरिएको पनि पाइएको छ । जनताले आफ्नो मत दिएर जिताएका जनप्रतिनिधि नै उपभोक्ता समितिमा लागी रकम हिनामिना गरे भने जनताले जनप्रतिनिधिबाट विकासको आस कसरी गर्ने ?
कर्णालीपाटी । १ आश्विन २०७७, बिहीबार १३:५३