कर्णालीले दियो कोशीलाई २०९ रनको लक्ष्य

---

चितवन | प्रथम अन्तर प्रदेश राष्ट्रिय खेलकुद प्रतियोगिता अन्तर्गत आज भएको क्रीकेटमा कर्णालीले कोशीलाई २०९ रनको लक्ष्य दिएको छ।

भरतपुर स्थित प्रस्तावित गौतमबुद्ध क्रीकेट रंगशालामा कोशीले टस जितेर बलिङ रोजेपछि पहिले ब्याटिङ गरेको कर्णालीले २० ओभरमा ६ विकेटको क्षतिमा २०८ रन जोड्यो।

कर्णालीका लागि बिपिन रावलले अर्धसतकीय पाली खेले । उनले नटआउट हुँदै ३५ बलमा ५४ रनको योगदान दिए । त्यसैगरी दिनेशले नट आउट हुँदै ८ बलमा २१ रन जोड्न सफल भएका थिए ।

बिपिन र अर्जुन घर्तिले कर्णालीका लागि ७० रनको साझेदारी खेलेका थिए। अर्जुनले ४२ रन जोडे। श्रवण किस्कुको बलमा फिरडोस अन्सारीले क्याच गर्दा उनी आउट भएका थिए । आउट हुनुअघि उनले २२ बलमा १ चौका र ४ छक्का प्रहार गरे।

त्यसअघि हिमान्शु शाहिलाई श्रवण किस्कुले नै श्रवण यादवबाट क्याच गराए। प्रतियोगितामा हिमान्शु र दिपेन्द्रले भने दोहोरो अंक जोड्न सकेनन ।

तेस्रो विकेटको रुपमा कर्णालीले ओपनर ब्याट्सम्यान रविन्द्र शाहीलाई गुमाएको थियो । रविन्द्रले २२ बल खेल्दै ४ चौका र २ छक्काको मद्दतले आफ्नो टिमलाई ३७ रनको योगदान दिएर आउट भएका थिए । कोसि का ज्ञानेन्द्र श्रेष्ठको बलिङमा श्रवण यादवको क्याचमा रविन्द्र आउट भएका थिए ।

कर्णालीले दोस्रो विकेटको रुपमा बिपिन बिक्रम शाहीलाई गुमाएको थियो । विपिन २२ बल खेल्दै २८ रन बनाएपछि ज्ञानेन्द्र श्रेष्ठले कट एण्ड बोल्ड पारेका थिए। बिपिन ३ चौका र २ छक्का हिर्काउदै पेभेलियन फर्किएका हुन। ओपनर मनिस थापा भने शून्य रनमा पेभेलियन फर्किए ।

बलिङमा भने कोशीका लागि ज्ञानेन्द्र श्रेष्ठ र श्रवण किस्कुले समान २-२ विकेट लगे । ज्ञानेन्द्रले ४ ओभरमा २५ रन खर्चिदै २ विकेट लगेका थिए भने श्रवण किस्कुले ४ ओभरमा ४३ रन खर्चिएका हुन । कोशीका लागि फिरडोस अन्सारीले मनिष थापालाई बोल्ड गर्दै पेभेलियन फर्काएका थिए ।