पालिकामै नुन पाउँदा स्थानीय खुसी

---

कालीकोटः जिल्लाको तिलागुफा नगरपालिका वडा नं ९, १० र ११ का स्थानीय नागरिकले पालिकामै नुन पाएपछि खुसी भएका छन् ।
नुनकै लागी जिल्ला सदरमुकाम मान्ममा चर्को रकम खर्च गरेर आउनुपर्ने बाध्यताको अन्त्य भएको भन्दै स्थानीय खुसी भएका हुन् । साल्ट टे«डिङ कर्पोरेशन लि. ले तिलागुफा नगरपालिकाको केन्द्र गाल्जेमा वितरण केन्द्र स्थापना गरेपछि त्यहाँका स्थानीय नागरिकलाई नुन लिनका लागि सदरमुकाम आउनुपर्ने बाध्यता हटेको छ ।
११ पोका नुनकै लागी जिल्ला सदरमुकाम मान्ममा चर्को खर्च गर्नुपर्ने बाध्यता हटेको तिलागुफा नगरपालिकाका प्रमुख शंकरप्रसाद उपाध्यायले बताए । २ हजार भन्दा बढी रुपैयाँ र पूरै एक दिन खर्चेर हिँड्दै सदरमुकाम मान्म पुगेपछि मात्र नुन देख्न पाउने तिलागुफा नगरपालिकाका नागरिकले अहिले घरनजिकै खुलेको वितरण केन्द्रबाट नुन पाउन थालेको उपाध्यायको भनाई छ । साल्ट ट्रेडिङ कर्पोरेसनको कालिकोट शाखा कार्यालयसँगको समन्वयमा नगरपालिकाले गाउँमा अस्थायी डिपो स्थापना गरेर सेवा दिएको उपाध्यायले बताए ।

वर्षौँपछि गाउँमा नुन पाउँदा आफु खुसी भएको जनक थापाले बताए । उनले भने केहीबेर त पालिकामै नुन पाउर्छौ भन्ने विश्वास नै थिएन आखिर पालिकाबाटै नुन पाउँदा खुसी लाग्यो । उनले भने, ‘११ पोका नुन लिन एक दिन हिँडेर सदरमुकाम मान्म धाउनुपर्ने बाध्यता थियो । एकपटक सदरमुकाम जाँदा–आउँदा २ हजारदेखि २ हजार पाँच सयभन्दा बढी पैसा खर्च हुन्थ्यो, अव समय पनि बच्यो पैसा पनि ।’
‘आयोडिनयुक्त नुन गाउँमा नै उपलब्ध गराउन र नुन लिन सदरमुकामसम्म धाउनुपर्ने बाध्यता हटाउनका लागि पालिका केन्द्रबाटै नुन वितरण गरिएको तिलागुफा नगरपालिकाका उपप्रमुख महेन्द्रबहादुर शाहीले बताए ।