महिला दिवसमा एकल महिलालाई सम्मान

---

कालीकोटः आज एक सय १५ औँ अन्तर्राष्ट्रिय महिला दिवस । ‘सबै महिला तथा बालिकाको लागिः अधिकार, समानता र सशक्तिकरण’ भन्ने नाराका साथ संसारभर विभिन्न कार्यक्रमका साथ मनाईएको छ ।
सरकार र सरोकारवाला निकाय तथा विभिन्न महिला संगठनले यस दिवसका अवसरमा विभिन्न कार्यक्रम आयोजना गरी भव्यताका साथ मनाएका छन् । कालीकोट जिल्लामा रहेका ९ वटै स्थानीय तहले पनि विभिन्न कार्यक्रम गरि ११५ र्औं अन्तराष्ट्रिय महिला दिवस मनाएका छन् ।
जिल्लाभरी विभिन्न क्षेत्रमा कार्यरत महिलाको आर्थिक, राजनीतिक र सामाजिक उपलब्धि स्मरण गर्दै महिलाको प्रविधिमा पहुँचको विस्तार गर्ने, महिला सशक्तिकरण अभिवृद्धि गर्ने, लैङ्गिक असमानता र हिंसाजन्य क्रियाकलाप निर्मूल गर्ने लक्ष्य सहित महिला दिवस भव्यताका साथ मनाइएको हो । यस्तै महिलालाई शिक्षित र आत्मनिर्भर बनाउने एवम् उचित सम्मान गर्नेलगायतका उद्देश्य पनि यस दिवसको रहेको छ ।
९ वटा स्थानीय तह रहेको कालीकोटमा विभिन्न स्थानीय तहले फरक फरक तरिकाले महिला दिवस मनाएका छन् भने महावै गाउँपालिकाले फरक ढंगले महिला दिवस मनाएको हो । अन्तराष्ट्रिय महिला दिवसका अवसर पारेर महावै गाउँपालिकाले पालिका भित्र रहेका ११५ जना एकल महिलालाई सम्मान गरेको गाउँपालिका अध्यक्ष खेमबहादुर सिंहले बताए ।