सडक खन्दा भत्किएको कुलो ७ बर्षसम्म पनि बनेन्

---

कालीकोटः जिल्लाको रास्कोट नगरपालिका–९ मा रहेको पनेरी कुलो भत्कीएको ७ बर्ष वितिसक्दा पनि बन्न सकेको छैन । सात वर्ष अघि लालु लैफु सडक खन्दा भत्किएको कुलो अहिले सम्म पनि निमार्ण हुन नसकेपछि स्थानीय मर्कामा परेका छन् ।
२०७९ सालको प्रतिनिधिसभा र स्थनीय तहको निर्वाचनका बेला उम्मेदवारहरुले चुनावी एजेण्डा बनाएपनि अहिले उनीहरु गुपचुप रहेको स्थानीयले आरोप लगाएका छन् । प्रतिनिधिसभा सदस्य महेन्द्रबहादुर शाही र रास्कोट नगरपालिकाका प्रमुख धर्मराज शाहीले कुलोको मर्मत गरि स्थानीय नागरिकको खेतबारीसम्म पानी पु¥याउने प्रतिवद्धता गरेर चुनाव जितेका थिए । चुनाव जितेको करिव २ वर्ष भन्दा बढी वितिसक्दा पनि अहिलेसम्म त्यो कुलोको लागि गरेको प्रतिवद्धता पुरा नभएको रास्कोट नगरबासीको भनाई छ ।
कुलो नहुदा अहिले आकाशे पानीको भरमा किसानले खेती गर्दै आएका छन् । पनेरी कुलो निमार्ण नहुँदा रास्कोट नगरपालिका–९ र ८ का स्थानीय नागरिक मर्कामा परेका हुन् । २ वटा वडामा रहका करिव ३ हजार घरधुरी सिचाई सुविधाबाट बन्चित भएका छन् । कुलोले सेरीज्यूलो, गुहानी ज्यूलो कनेतोलि लगायतका खेतबारी बाझै रहेको स्थानीय आनन्द न्यौपानेले बताए ।
उनले भने ‘७ बर्ष अघि लालुलैफु कृषि रोड खन्दा पहुँचको आधारमा सडक निमार्ण गरिदा भत्किएको कुला अहिलेसम्म पनि निमार्ण भएको छैन । पनेरी कुलोको प्रयोग गरि खेती पाति गर्ने स्थानीयले खेती लगाउन गाह्रो भएको छ । पनेरी कुलाबाट लाभान्वित कृषक दैनिक गास कमाउने खेतमा समयमा खेति गर्न नपाइने भएपछि भारतमा काम गरेर यहाँ चामल किनि खानुपर्ने परिस्थिति आएकोले किनेर खानु भन्दा उतै भारतमा बस्ने गरि गाउँ छोड्न बाध्य भएका छन् ।’
५ बर्षदेखि किसानहरुको धान रोप्ने खेतियोग्य जग्गा पानीको अभावले बाँझो छ । जग्गा बाँझो भएपछि किसानहरुले तराईबाट जाने सेतो चामल किनेर परिवार पाल्नुपर्ने बाध्यता भएको छ । आकासबाट पानी परेमा मकै लगाउनेसम्म गरेका किसानहरु त्यो पनि बर्षेनी हुने खडेरीका कारण निरास भएका छन । उल्टै भोकमरीको चपेटाखेपिरहेका छन । रास्कोट भन्ने नाम नै रसिलो र उर्जरभूमी भएको जग्गा र सिँचाई सुविधा सम्पन्न ठाउँ भएको बुझाई हुने गरेपनि कुलोको समस्याका कारण मरुभूमी जस्तै हुनथालेको स्थानीयको भनाई छ ।
लालु –लैफु सडक निमार्णका क्रममा ५ बर्षअघि २०७६ सालमा फुकोटको भानढुकुरी हुदै डोजर लगाएर सडक खन्न थालेपछि कुलो भत्कीएको थियो । अहिलेसम्म सडक पनि बनेको छैन । यता कुलो पनि बन्न सकेको छैन । जसका कारण किसानहरु न गाडीको सुविधामा छन न त कुलोको सिंचाई सुविधामा छन । कुलो भत्कीएपछि अहिले रास्कोट नगरपालिका वडा नम्बर ८ र ९ का झण्डै तीन हजार घरदुरीका किसानहरुको खेतियोग्य जग्गा बाँझो रहेको छ ।

करिब एक किलोमिटर टाढा फुगाड खोलाबाट ल्याएको कुलो सडकले पुरै भत्कीएपछि सिचाँई सुविधा बञ्चित भएको किसानहरुले दुखेसो पोखेका छन । नेताहरुले कुलो बनाउने चुनाबी एजेण्डा बनाएर जनताको भोटबाट चुनाब जितेपनि किसानहरुको समस्या ज्यूका त्यू रहको न्यौपानेले बताए ।
अहिले रास्कोटवासी किसानहरुले रास्कोटमा उत्पादन हुने रातो चामल सपना जस्तै हुन थालेको गुनासो पनि उनको छ । किसान न्यौपानेले भने, ‘चुनावको बेला तत्कालै कुलो बनाउछौ भनेका मेयर धर्मराज शाही र माननीय महेन्द्रबहादुर शाहीले अहिले कुनै चासो दिएका छैनन् ।’ यता रास्कोट नगरपालिकाका प्रमुख धर्मराज शाहीले यस वषको बजेटमा उक्त कुलोलाई बजेटमा समेट्ने बताए ।