किशोरीमाथि सामुहिक बलात्कार

---

डोल्पा । डोल्पामा एक किशोरी सामूहिक बलात्कार भएको छ । जगदुल्ला गाउँपालिका–६, झ्याकोटकी १८ वर्षीया किशोरीमाथि सामूहिक बलात्कार भएको हो ।

उक्त गाउँपालिकाको भवन निर्माण जिम्मा पाएका बारेकोट गाउँपालिका–६, का ३१ वर्षीय कर्णबहादुर महतारा र जगदुल्ला–४ का ३१ वर्षीय अंगतबहादुर महताराले जबरजस्ती सामूहिक बलात्कार गरेको प्रदेश प्रहरी कार्यालयका प्रवक्ता राजेशनाग बास्तोलाले जानकारी दिए ।

उनका अनुसार बलात्कार गर्ने दुबै जनालाई पक्राउ गरिएको छ । उनीहरूले ललाइफकाइ पारि पीडित किशोरीकै घरमा लिएर जबरजस्ती करणी गरेको उनको भनाइ छ । प्रहरीमा बलात्कारका मुद्दा दर्ता भए पनि होस्टाइल हुँदा बलात्कारका घटनाले प्रसय पाइरहेका छन् ।

दोषीलाई कारबाहीको दायरामा ल्याउँदा यस्ता घटना न्यूनीकरण हुने महिला अधिकारकर्मीहरु बताउँछन् । बलात्कारपछि हत्या गर्दासमेत कानुन लाचार हुँदा पीडकहरूको मनोबल बढ्ने र पीडितको न्याय हरण हुने महिला अधिकारकर्मी देवीसरा विश्वकर्माले बताइन् ।