सल्यानमा झारफुकको बहानामा बलात्कार

---

सल्यान । बलात्कार गरेको आरोपमा शारदा नगरपालिका –८ सिमखर्क निवासी ३८ वर्षीय पुरुष पक्राउ परेका छन् । उनले भाउजु नाता पर्ने ४० वर्षीया महिलालाई झारफुकको बहानामा बलात्कार गरेको पीडितले प्रहरीमा दिएको जाहेरीमा उल्लेख छ ।

लामो समयदेखि टाउको दुख्ने समस्या भएकी महिलाले काठमाडौं र धुलिखेलका अस्पतालमा गएर उपचार गरे पनि निको नभएको ती पुरुषलाई बताएकी थिइन् ।

यस्तो समस्या आफुले झारफुकबाट निको बनाइदिने भनेपछि ती महिला श्रीमान सहित २० साउन राती उनको घरमा गएकी थिइन् । घरमा ती पुरुषसँगै छोरा र श्रीमती पनि रहेको तर झारफुक गर्दा कोठामा कोही बस्न नहुने भन्दै सबैलाई बाहिर पठाएका थिए ।

बन्द कोठामा शिवपार्वती बन्नु पर्छ भन्दै महिलालाई पार्वती र आफु शिव भइ केही समय झारफुक गरेको र पछि भगवानलाई खुशी बनाउन भन्दै बलात्कार गरेको पीडित महिलाले बताईन् । पीडितको स्वास्थ्य सेवा कार्यालय सल्यानमा स्वास्थ्य परीक्षण गरेको प्रहरीले बताएको छ ।

आरोपीलाई जिल्ला अदालतबाट म्याद थप गरि अनुसन्धान सुरु गरिएको जिल्ला प्रहरी कार्यालय सल्यानका सूचना अधिकारी प्रहरी निरीक्षक उमाकान्त जोशीले बताए ।

पछिल्लो एक सातामा सल्यानमा बलात्कारका तीन वटा घटना भएका छन् । शारदा नगरपालिका–१२ मा १५ वर्षीया बालिका र शारदा नगरपालिका–६ मा १२ वर्षीया बालिका बलात्कारको शिकार भएको प्रहरीले बताएको छ । सबै घटनाका आरोपिलाइ प्रहरीले पक्रेर आवश्यक कार्वाही अगाडी बढाइ सकेको जिल्ला प्रहरी कार्यालयका प्रहरी प्रमुख डिएसपी ढकेन्द्र खतिवडाले जानकारी दिए ।