कालिकोटमा जीप दुर्घटना हुँदा कम्तिमा ८ जनाको मृत्यु, उद्दार चल्दै

---

सुर्खेत। कालिकोटमा यात्रुवाहक जीप दुर्घटना भएको छ । दुर्घटनामा कम्तिमा ८ जनाको मृत्यु भएको छ । पलाँता गाउँपालिका वडा नम्बर ३ मा आइतबार दिउँसो साढे २ बजेतिर बलेरो जीप दुर्घटना भएको हो ।

दुर्घटनामा ८ जनाको घटनास्थलमै मृत्यु भएको स्थानीयले बताएको कालिकोटका प्रमुख जिल्ला अधिकारी नारायणप्रसाद भट्टराईले जानकारी दिए ।

उनका अनुसार मृतकको संख्या अझै यकिन हुन सकेको छैन । स्थानीयले ८ देखि ९ जनाको मृत्यु भएको बताएको उनले जानकारी दिए ।

उक्त जीप स्थानीयस्तरमा चल्ने गरेको जानकारी प्राप्त भएको उनले बताए ।

दुर्घटनास्थल दुर्गम क्षेत्रमा रहेकाले प्रहरी, सेनाको टोली गएको छ । दुर्घटनामा केही घाइते भएको र उनीहरुको उद्दारका लागि गृह मन्त्रालयसँग हेलिकप्टर माग गरिएको पनि उनले बताए ।