माल्कोटमा सडक बिस्तारः नागरिकलाई सहजता अध्यक्ष बिष्ट

---

कालीकोट । नरहरिनाथ गाउँपालिकाको माल्कोटमा पहिलो पटक गाडी पुगेको छ । गाडी पुगेसँगै स्थानीय बासिन्दाको सपना साकार भएको छ । नरहरिनाथ गाउँपालिकाले लामो समयदेखि गरेको मेहनत र लगानिलेगर्दा खुलालु ,विश्वकुना, पिपलरुख, थाडुमाडु, उच्छव हुँदै रामारोशन पर्यटकीय सडकमार्ग अन्तर्गत माल्कोट सेरापाटासम्म सवारी साधन पुग्न सफल भएको हो ।

सडक माल्कोट पुगेपछि गाडी लियर माल्कोट नै पुगेर नगेन्द्रबहादुर बिष्टले सडकको उद्घाटन गरेका हुन ।

सडक उद्घाटन कार्यक्रममा गाउँपालिका अध्यक्ष नगेन्द्रबहादुर बिस्ट, उपाध्यक्ष कमलकुमार शाह, प्रमुख प्रशासकीय अधिकृत युवराज पौडेल, सम्पूर्ण वडाध्यक्षहरू, कार्यपालिका सदस्यहरू, कर्मचारी, राजनीतिक दलका प्रतिनिधिहरू, पत्रकार तथा सुरक्षाकर्मी र स्थानीयहरुको बाक्लो उपस्थिति रहेको थियो ।
अध्यक्ष बिष्टले गाउँपालिकाको दीर्घकालीन योजनाअन्तर्गत यो सडक निर्माण सम्पन्न भएको बताउँदै यसको प्रभावले शिक्षा, स्वास्थ्य, व्यापार तथा पर्यटनमा ठूलो सुधार आउने ,सडकले नागरिलाई सहजता ल्याउने बताए । उनले सडक बिस्तारमा सहयोग गरेकामा माल्कोट बासिन्दारुलाई धन्यवाद समेत ब्यक्त गरे ।

स्थानीय बासिन्दाले सडक निर्माणलाई स्वागत गर्दै गाउँमा यातायातको सुविधा पुगेपछि सहज आवतजावत, व्यापारको प्रवर्द्धन, कृर्षिजन्य पदार्थको ढुवानीमा सहजता, स्वास्थ्य सेवा तथा शिक्षामा पहुँच बढ्ने विश्वास व्यक्त गरेका छन् । गाडी नपुगेका कारण यहाँका नागरिकले लामो दूरी हिँड्नुपर्ने बाध्यता थियो, तर अब सहज यातायातका कारण माल्कोट विकासको मूल प्रवाहमा समाहित हुनेछ ।

यो सडकले यातायातको सुविधा मात्र नदिएर माल्कोटको ऐतिहासिक संघर्षलाई विकाससँग समेत जोडेको छ।

अब यहाँ पर्यटन प्रवर्द्धनका लागि नयाँ योजना ल्याइने र स्थानीय उत्पादनलाई बजारसँग जोड्ने काम गर्ने गाउँपालिका उपाध्यक्ष कमलकुमार शाहले बताए