राँचुलीका यूवाहरु सरसफाई अभियानमा

---

कालिकोट । जिल्लाको तिलागुफा नगरपालिका–४ राँचुलीका युवा पूर्ण सरसफाइ अभियानमा जुटेका छन् । साविकको राँचुली गाविस खुला दिसामुक्त घोषणा भएको लामो समयपछि स्थानीयले खुला स्थानमा दिशा गर्न थालेपछि स्थानीय युवा सरसफाइ अभियानमा जुटेका हुन् । कर्णालीको चर्चित पर्यटकीयस्थल मुगुको रारा ताल जाने कर्णाली राजमार्गसँग जोडिएको राचुलीलाई सुन्दर सफा, सभ्य गाउँका रुपमा विकास गर्ने उद्देश्यले पूर्ण सरसफाइ अभियान सुरु गरेको स्थानीय फुलबारी युवा क्लवका अध्यक्ष कमलबहादुर शाहीले बताए ।
उनका अनुसार गाउँमा प्लाष्टिकजन्य फोहोर तथा अन्य फोहोर जथाभावी फाल्दा गाउँ नै दुर्गन्धित भएपछि युवा क्लवले घरदैलोमा पुगेर सूचना गर्नुका साथै फेला पारेको फोहोर संकलन गरेका हुन् । यस्तै क्लवका सचिव मुकेश विकले तिलागुफा नगरपालिकाका ११ वटा वडामध्य वडा नं. ४ लाई पहिलो पूर्ण सरसफाईयुक्त वडा घोषणा गर्न वडापालिका र भिडिसेफ नेपालको सहयोगमा सरसफाई अभियान थालेको बताए ।
यस्तै, युवा क्लबका सहसचिव प्रशान्त शाहीले फूलबारी युवा क्लवले मुख्यगरी पूर्ण सरसफाइयुक्त वडा बनाउनका लागि सचेतनाका साथै गाउँलाई जुवा, तास र मदिरा निषेधित बनाउने बताए । उनले भने, ‘अहिले खुलारुपमा मदिरा बिक्री वितरणमा बन्देज लगाएका छौं । जुवा तास खेलेको फेला पारे सार्वजनिक रुपमा दण्डित गर्ने र प्रहरीलाई खवर गर्ने तयारी छ ।’ गाउँमा हुने विभिन्न अपराधिक घटना न्युनिकरणका लागि मदिरा, जुवा र तास बन्द हुनुपर्ने उनको भनाई छ ।
तिलागुफा नगरपालिका–४ का वडाध्यक्ष खड्गराज शाहीले वडामा युवाले थालेको अभियानमा आफूहरुको साथ रहेको बताए । उनले वडापालिकाले गर्ने अभियान युवाको अगुवाईमा भएपछि यसलाई प्रभावकारी र व्यवस्थितरुपमा सञ्चालन गरिने बताए । भिडिसेफ नेपालको युवा सशक्तिकरण परियोजनाका प्रमुख भुपालसिंह बोहोराले आफूहरुले युवा क्लवको गठनदेखि उनीहरुले गर्ने हरेक क्रियाकलापमा सहयोग गर्दै आएको बताए । पछिल्लो समयमा ग्रामीण समुदायमा पूर्ण सरसफाइको अभियानलाई प्रभावकारी बनाउन स्थानीयको सक्रियता बढेको छ ।